Լազերային էպիլյացիա. Սալուտեմ ամսագիր №2

Բժիշկ-կոսմետոլոգի հմուտ ձեռքերում լազերը դարձել է մարմնի անցանկալի մազերի դեմ պայքարի նուրբ և հզոր գործիք։ Հեշտ է բացատրել, թե ինչու են շատերը նախապատվությունը տալիս լազերային էպիլյացիային, նմանատիպ միջոցառումների շարքում այն առանձնանում է արդյունավետությամբ, արագությամբ և ցավի բացակայությամբ։ Լազերային էպիլյացիայի 1-2 կուրս անցնելուց հետո երկար ժամանակով ազատվում եք ավելորդ մազերից։ Այս մեթոդի մասին կան բազմաթիվ կարծիքներ, գործնական արդյունքներ, նաև լեգենդներ։ Պատասխանենք հաճախ տրվող հարցերին` բոլոր վախերը և կասկածները ցրելու համար։

Հակացուցումներ.

• հղիություն,
• կրծքով կերակրման շրջան,
• հերպես,
• մաշկավեներական հիվանդություններ` սրացման
• շրջանում (էկզեմա, ակնե, փսորիազ),
• մշակման ենթակա շրջանում` խալերի առկայություն,
• վիտիլիգո,
• վարակիչ հիվանդություններ, մրսածություն,
• շաքարային դիաբետ,
• արյան հիվանդություններ,
• երակների վարիկոզ լայնացում,
• ուռուցքային հիվանդություններ,
• մշակման ենթակա շրջանում՝մաշկի վնասվածքներ (քերծվածքներ, այրվածքներ, քորելու հետքեր, թարախային բշտիկներ և այլն),
• հոգեշարժական գրգռմամբ հոգեկան հիվանդություններ (լուսային էպիլեպսիա),
• լազերային էպիլյացիայի սեանսից առաջ 14 օրվա
• ընթացքում՝ թարմ արևայրուկ,
• լազերային էպիլյացիայի սեանսից առաջ 14 օրվա ընթացքում` հակաբիոտիկների ընդունում։

էպիլյացիայի և դեպիլյացիայի տարբերությունը

Դեպիլյացիայի ժամանակ հեռացվում է մազերի միայն այն մասը, որը երևում է մաշկի վրա, ինչի հետևանքով մազերը նորից սկսում են աճել։ Լազերային էպիլյացիայի ժամանակ հեռացվում է մազարմատը` կոճղեզի, այն սնող մազանոթների և նախորդող բջիջների հետ միասին:

Ինչպե՞ս նախապատրաստվել լազերային էպիլյացիային։

• լազերային էպիլյացիայի սեանսից առաջ 2-3 շաբաթվա ընթացքում չկիրառել էպիլյացիայի այլ մեթոդներ,
• լազերային էպիլյացիայի սեանսից առաջ 2-3 շաբաթվա ընթացքում չարևահարվել, չայցելել սոլյարի, չկիրառել արևայրուկի քսուկներ, չընդունել հակաբիոտիկներ,
• դիոդային լազերով էպիլյացիայի դեպքում, 24 ժամ առաջ, նախքան կոսմետոլոգին այցելելը,սափրել մշակման ենթակա հատվածի մազերը։

Ո՞ր տարիքից կարելի է կատարել լազերային էպիլյացիա։

Այս միջոցառման համար տարիքային սահմանափակումներ չկան, սակայն մանկական տարիքում ցանկալի չէ։
Սեռական հասունացման շրջանում (12-16 տարեկան) աղջիկների և պատանիների մոտ մազերն առատորեն և արագ աճում են։ Ընդ որում, ինչպես հաստ մազերը, այնպես էլ աղվամազերը։ Ուստի մազերը լազերային էպիլյացիայով հեռացնելու համար նրանք ստիպված են կարճ ընդմիջումներով ավելի շատ սեանսներ իրականացնել, քան` մեծահասակները։

Ինչպե՞ս է տեղի ունենում լազերային էպիլյացիայի գործընթացը։

Միջոցառման իրականացման հիմնական փուլերն են.

• կոսմետոլոգի խորհրդատվություն,
• մշակման ենթակա հատվածի նախապատրաստում,
• դիոդային էպիլյացիայի ժամանակ` մաշկային մակերեսի պատում` դոնդողով (գել),
• լազերային ազդեցություն։

Որքա՞ն ժամանակ է տևում միջոցառումը

Միջոցառման տևողությունը պայմանավորված է մշակման ենթակա հատվածի չափերով.

• դեմքի մշակում՝ 20-30 րոպե,
• խորը բիկինի՝ 20-30 րոպե,
• ոտքերն ամբողջությամբ՝ 60-90 րոպե։

Քանի՞ անգամ պետք է իրականացնել միջոցառումը, և ինչո՞վ է պայմանավորված քանակը։

Ցանկալի արդյունքը նկատելի կլինի 4-6 միջոցառումից հետո։ Սրանք պայմանական ժամկետներ են, կուրսը կարող է բաղկացած լինել 10 և նույնիսկ 15 սեանսից` կապված մարմնի մշակման ենթակա հատվածից։

Յուրաքանչյուր միջոցառման ժամանակ լազերն ազդում է աճման փուլում գտնվող ֆոլիկուլի, այսինքն՝ ակտիվ մազերի վրա։ Ոչնչացումից հետո, որպես կորստի փոխհատուցում, արթնանում են այլ կոճղեզներ։ Դրանք սկսում են զրոյից աճել, և նոր մազեր են առաջանում։ Հենց սա է պատճառը, որ մի քանի սեանսի կարիք է լինում։ Տեղի է ունենում քնած ֆոլիկուլների ակտիվ աճի մի քանի ալիք։ Յուրաքանչյուր հաջորդ ալիքն ավելի ու ավելի «աղքատիկ» է. մազերի քանակն` ավելի քիչ, գույնը՝ ավելի բաց։

Ըստ վիճակագրության` առաջին սեանսից հետո մազերի քանակը կրճատվում է 10-25%-ով։ Յուրաքանչյուր հաջորդ միջոցառումից հետո այդ տոկոսն ավելանում է։ Սեանսների միջև անհրաժեշտ է 1-2 ամիս դադար պահպանել։

Էպիլյացիայից որքա՞ն ժամանակ հետո են թափվում մազերը։

Մազերի ոչ մեծ քանակություն թափվում է սեանսի ավարտին, իսկ հիմնական մասը՝ 7-10 օրվա ընթացքում։ Առաջին էպիլյացիայից հետո թափվում է մազերի ընդամենը 10-25%-ը։

Որքա՞ն ժամանակ է պահպանվում արդյունքը։

Կուրսն անցնելուց հետո արդյունքը պահպանվում է 2-5 տարի՝ պայմանավորված էպիլյացիայի ենթարկվող հատվածից և օրգանիզմի հորմոնային ֆոնից։

Ցավազրկումը` էպիլյացիայի ժամանակ

Դիոդային լազերով աշխատելու ժամանակ բժիշկը մշակվող մաշկը պատում է հատուկ սառեցնող գելով։ Դա բավարար է միջոցառումը հնարավորին հարմարավետ և անցավ կատարելու համար։

Որքա՞ն հաճախ պետք է կատարել լազերային էպիլյացիա։

Կայուն արդյունքի համար պահանջվում է 5-10 միջոցառումից բաղկացած 1 կուրս։ Ցիկլը կրկնում են յուրաքանչյուր 2-5 տարին մեկ՝ պայմանավորված մշակվող հատվածով։

Ինչո՞ւ պետք է լազերային էպիլյացիան կրկնել։

Օրգանիզմում կան մազային կոճղեզներ, որոնք երկար ժամանակ գտնվում են «քնի ռեժիմում», սակայն արտակարգ իրավիճակներում արթնանում են։ Օրգանիզմի համար նման արտակարգ իրավիճակներ են.

• հորմոնային ֆոնի խանգարումը,
• հղիությունը,
• ծննդաբերությունը,
• խմելու համար նախատեսված հակաբեղմնավորիչների կամ այլ հորմոնային պատրաստուկների ընդունումը։

Կրկնակի կուրսը բաղկացած է նվազագույն քանակությամբ միջոցառումներից` 2-5 սեանս:

Արդյոք վնասակա՞ր է լազերային էպիլյացիան։

Միջոցառումը լիովին անվտանգ է, եթե ճիշտ է իրականացվում։ Լուսային ալիքները ենթամաշկային ճարպաբըջջանքից խոր չեն ներթափանցում, ուստի չեն կարող ազդել ներքին օրգանների վրա։ Լազերային ճառագայթումը մաշկը չի վնասում, եթե սարքը ճիշտ է գործարկված։

Ի՞նչ չի կարելի անել էպիլյացիայից հետո։

Չի կարելի մազերն էպիլյացիա անել այլ մեթոդներով, ինչպիսիք են մոմը, շաքարը, էպիլյատորը կամ ունելին։ Սեանսից հետո արգելվում է արևայրուկ ընդունել` 7-14 օր (այդ թվում՝ սոլյարիում)։ Միջոցառման իրականացման օրը չի կարելի տաք լոգանք կամ ցնցուղ ընդունել, սաունա կամ լողավազան գնալ, օգտագործել սկրաբ և կոշտ սպունգ։

www.laser-estetik.ru

«ՍԱԼՈՒՏԵՄ» առողջ ապրելակերպի ամսագիր
Պետական գրանցման համար․ 211․200․00969
magazinesalutem@gmail.com
+(374) 91 64 10 15
+(374) 98 79 15 15

Հարցեր, պատասխաններ, մեկնաբանություններ